អំពីមជ្ឈមណ្ឌលបច្ចេកវិទ្យាសហគមន៍

រាជរដ្ឋាភិបាលនីតិកាលទី៧ នៃរដ្ឋសភា បាននិងកំពុងយកចិត្តទុកដាក់ខ្ពស់លើការធ្វើបរិវត្តកម្មឌីជីថលសេដ្ឋកិច្ច និងសង្គមទាំងមូល តាមរយៈការដាក់ចេញនូវ “យុទ្ធសាស្ត្របញ្ចកោណ ដំណាក់កាលទី១”។ ជាក់ស្តែង រាជរដ្ឋាភិបាល បានកំណត់យកអាទិភាពគន្លឹះ ៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា” ជាគ្រឹះនិងមធ្យោបាយដ៏សំខាន់ដើម្បី សម្រេចបានចក្ខុវិស័យកម្ពុជា ឆ្នាំ២០៥០។ ការបន្ថែម “បច្ចេកវិទ្យា” ជាពិសេស “បច្ចេកវិទ្យាឌីជីថល” ជាអាទិភាពគន្លឹះ ថ្មីនេះហើយ ដែលសបញ្ជាក់ថារាជរដ្ឋាភិបាលចាត់ទុកបច្ចេកវិទ្យាឌីជីថលជាកាតាលីករថ្មីដ៏មានសារៈសំខាន់ មាន សក្តានុភាពនិងកាលានុវត្តភាព ក្នុងការជំរុញកំណើនផលិតភាពសេដ្ឋកិច្ចនិងសង្គម ក៏ដូចជាប្រសិទ្ធភាពរដ្ឋបាលនិង ជាមាគ៌ានយោបាយរួមសម្រាប់តម្រង់ទិសនិងជំរុញការអនុវត្ត “ក្របខណ្ឌគោលនយោបាយសេដ្ឋកិច្ច និងសង្គមឌីជីថល កម្ពុជា ២០២១-២០៣៥” ដែលជាមគ្គុទេសក៍តម្រង់ទិសសម្រាប់ការអភិវឌ្ឍ និងដំណើរការនៃបរិវត្តកម្មឌីជីថលនៅកម្ពុជា និង “គោលនយោបាយរដ្ឋាភិបាលឌីជីថលកម្ពុជា ២០២២-២០៣៥” សំដៅធ្វើបរិវត្តកម្មរដ្ឋាភិបាលឌីជីថល ពេញលេញ។

ក្នុងកិច្ចខិតខំជំរុញការកសាងមូលធនមនុស្សឌីជីថល ដើម្បីអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ គោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ជាពិសេស គឺការចូលរួមអនុវត្តក្របខណ្ឌយុទ្ធសាស្ត្របញ្ចកោណដំណាក់កាលទី១ ដែលបានកំណត់យកបច្ចេកវិទ្យា ជាពិសេស បច្ចេកវិទ្យាឌីជីថលជាអាទិភាពគន្លឹះទី៥ និងគោលនយោបាយ សេដ្ឋកិច្ច សង្គម និងរដ្ឋាភិបាលឌីជីថលកម្ពុជា ឱ្យមាន ប្រសិទ្ធភាព ក្រសួងប្រៃសណីយ៍និងទូរគមនាគមន៍ (ក.ប.ទ.) បានបង្កើតគម្រោងការកសាងមជ្ឈមណ្ឌលបច្ចេកវិទ្យា សហគមន៍នៅតាមវិទ្យាល័យសាធារណៈ ដើម្បីបំពេញបេសកកម្មលើគំនិតផ្តួចផ្តើមបរិវត្តកម្មឌីជីថលបម្រើដល់ការអប់រំ ដែលនឹងរួមចំណែកដល់ការអភិវឌ្ឍមូលធនមនុស្សឌីជីថល និងអនាគតឌីជីថលកម្ពុជា។ គម្រោងនេះ គឺជាការឆ្លុះបញ្ចាំង ពីចក្ខុវិស័យវែងឆ្ងាយរបស់ ក.ប.ទ. ដោយផ្តោតលើផែនការអភិវឌ្ឍមូលធនមនុស្សលើមុខជំនាញបច្ចេកវិទ្យាឌីជីថល ក្នុងកម្រិតមធ្យមសិក្សា ហើយ មជ្ឈមណ្ឌលបច្ចេកវិទ្យាសហគមន៍ (ម.ប.ស.) ដែលសរសេរជាភាសាអង់គ្លេស Community Tech Center (CTC) នឹងក្លាយជាមជ្ឈមណ្ឌលផ្តល់ការបណ្តុះបណ្តាលពាក់ព័ន្ធនឹងជំនាញបច្ចេកវិទ្យា ឌីជីថល និងផ្តល់សេវាប្រៃសណីយ៍ដល់ប្រជាពលរដ្ឋក្នុងសហគមន៍ ជាពិសេសដល់សិស្សានុសិស្ស និងសាធារណជន រស់នៅក្នុងមូលដ្ឋាន ក្នុងគោលបំណងជំរុញការបណ្តុះបណ្តាលធនធានមនុស្សឌីជីថល លើកកម្ពស់អក្ខរកម្មឌីជីថល និងកាត់បន្ថយគម្លាតឌីជីថលនៅក្នុងសហគមន៍ប្រកបដោយបរិយាបន្ន និងនវានុវត្តន៍។

ក្នុងរយៈពេលប៉ុន្មានឆ្នាំចុងក្រោយនេះ បច្ចេកវិទ្យាឌីជីថលនៅកម្ពុជាមានការរីកចម្រើនឆាប់រហ័សគួរឱ្យកត់ សម្គាល់។ ទោះជាយ៉ាងនេះក្តី ការត្រៀមខ្លួនរបស់កម្ពុជាក្នុងការចាប់យកវិស័យឌីជីថលនៅមានបញ្ហាច្រើន ដែល ទាមទារឱ្យមានការចូលរួមយ៉ាងសកម្មពីតួអង្គពាក់ព័ន្ធ ជាពិសេសត្រូវមានធនធានមនុស្សប្រកបដោយចំណេះដឹង មូលដ្ឋាន និងជំនាញឌីជីថលគ្រប់គ្រាន់។ ម.ប.ស. មានតួនាទីសំខាន់ក្នុងការប្រែក្លាយប្រជាពលរដ្ឋកម្ពុជា ឱ្យទៅជា ពលរដ្ឋឌីជីថលតាមរយៈការជំរុញការចាប់យកបច្ចេកវិទ្យាឌីជីថលមកប្រើប្រាស់ សម្រាប់ជីវិតរស់នៅប្រចាំថ្ងៃ ប្រកប ដោយប្រសិទ្ធភាព និងការទទួលខុសត្រូវខ្ពស់។ ក្នុងស្មារតីនេះការរៀបចំសៀវភៅគោលការណ៍ប្រតិបត្តិសម្រាប់ ម.ប.ស. គឺជាកិច្ចការដ៏មានសារៈសំខាន់ មិនអាចខ្វះបាន ដើម្បីធានាថាមុខងារ ម.ប.ស. អាចឆ្លើយតបប្រកបដោយប្រសិទ្ធភាពនិងស័ក្តិសិទ្ធិភាពក្នុងការ បណ្តុះបណ្តាល និងតម្រូវការថ្មីៗរបស់សិស្ស និងប្រជាពលរដ្ឋនៅសហគមន៍។